ភ្នំពេញ៖ នាយករដ្ឋមន្ត្រី សម្ដេចតេជោ ហ៊ុន សែន នឹងធ្វើដំណើរទៅកាន់ខេត្តចំនួន ៤គឺខេត្តសៀមរាប បន្ទាយមានជ័យ បាត់ដំបង និងខេត្តពោធិ៍សាត់ ដើម្បីជួបសំណេះសំណាលនិងដោះស្រាយជូនប្រជាពលរដ្ឋដែលរងគ្រោះទឹកជំនន់។

បង្ហោះសារនៅលើបណ្ដាញសង្គម នៅព្រឹកថ្ងៃអង្គារ ទី១៨ ខែតុលានេះ នាយករដ្ឋមន្ត្រីកម្ពុជាឱ្យដឹងថា សម្ដេចនឹងធ្វើដំណើរទៅកាន់ខេត្តចំនួន ៤គឺ ខេត្តសៀមរាប បន្ទាយមានជ័យ បាត់ដំបង និងខេត្តពោធិ៍សាត់ ដោយប្រើពេល ៥ថ្ងៃ ៤យប់ ដើម្បីជួបនិងដោះស្រាយជូនប្រជាជនដែលរងគ្រោះដោយជំនន់ទឹកភ្លៀង។

គួរបញ្ជាក់ផងដែរថា ការចុះជួបសំណេះសំណាលជាមួយប្រជាពលរដ្ឋតាមខេត្តចំនួន ៤នេះ នឹងធ្វើឡើងបន្ទាប់ពីសម្ដេចបានទទួលប្រធានាធិបតីទីម័រឡេស នាថ្ងៃទី២០ ខែតុលា ជាមុនសិន។

យ៉ាងណាមិញក្នុងសារដដែល នាយករដ្ឋមន្ត្រីមានប្រសាសន៍ថា សម្ដេចបានត្រៀមខ្លួនហត់នឿយកិច្ចការក្នុងប្រទេស មុននឹងហត់កិច្ចការអន្តរជាតិដែលមាន ASEAN.G20.APEC ក្នុងខែវិច្ចិកាខាង មុខនេះផងដែរ៕